Addi og Binni rifja upp nokkrar vel valdar ferðir forseta íslenska lýðveldisins norður yfir heiðar á árunum 1951 – 2017. Rauði þráðurinn er ferðalag frú Vigdísar Finnbogadóttur um Norðurland sumarið 1981. Í þessum fyrri þætti af tveimur spjalla þeir félagar um kvennabaráttu á áttunda áratugnum, kosningabaráttu Vigdísar og fyrstu opinberu heimsóknir hennar í embætti. Ferðalög herra Sveins Björnssonar til Eyjafjarðar árið 1951 og herra Ásgeirs Ásgeirssonar árið 1962 koma einnig við sögu.
Þátturinn er tekinn upp í Stúdíó Sagnalist í Kristnesi í Eyjafjarðarsveit. Arnar og Brynjar eru á heimilislegum nótum þar sem þeir spjalla um gengnar kynslóðir og gleymda atburði yfir kaffibolla. Sannar og lognar sögur af aðli og almúga með Adda og Binna í hlaðvarpi Sagnalistar.